Lesa meira
Í dag er skráning gagna um börn innan skólakerfisins, umsýsla upplýsinga, utanumhald og skipulag, unnin að miklu leyti með handvirkum hætti. Gögn um skólavist, námsmat og ýmsar aðrar upplýsingar verða til á víð og dreif milli kerfa og stofnana og eru geymd í ólíku formi á mismunandi stöðum sem tala ekki saman.
Það skapar hættu á því að nauðsynlegar upplýsingar um barn fylgi ekki þegar barn flyst á milli skólastiga, milli skóla, sveitarfélaga eða landshluta. Samfellan í sögu barnsins týnist og byrja þarf upp á nýtt. Hér glatast dýrmætur tími og tækifæri í stuðningi við barn.
Á sama tíma er veruleiki sumra barna í dag sá að þau lifa, læra og leika sér þvert á mörk sveitarfélaga. Barn getur búið eina vikuna hjá lögheimilisforeldri og hina vikuna í öðru sveitarfélagi hjá forsjárforeldri. Þá getur það gengið í skóla í þriðja sveitarfélaginu og jafnvel verið í tómstundum í því fjórða.
Núverandi kerfi leiðir til ósamræmis sem torveldar okkur yfirsýn, hvort sem er yfir stöðu einstaka barns eða menntakerfisins í heild sinni, og kemur í veg fyrir að unnt sé að gera úrbætur þar sem þeirra er þörf. Þessar aðstæður skapa áskoranir fyrir sveitarfélögin sem hafa ekki möguleika á að hafa heildstæða sýn og þannig halda sem best utan um barnið og velferð þess.
Traust og öruggt menntakerfi er grundvöllurinn að velsæld samfélagsins okkar. Með því að tryggja að viðeigandi gagnaskráning fari fram í gegnum miðlægan grunn treystum við sameiginlega stoðir menntakerfisins okkar til framtíðar - og til þess er Frigg.
Um leið og barn hefur verið skráð í gagnagrunn Friggjar er það komið í öruggar hendur á meðan á skólagöngu þess stendur.
Þegar forsjáraðilar staðfesta skólavist barns í fyrsta sinn í gegnum Ísland.is eru upplýsingar um nemandann sjálfkrafa skráðar miðlægt í Frigg. Þessum upplýsingum viðhalda eða uppfæra svo forsjáraðilar í hvert sinn sem þeir sækja um þjónustu fyrir barnið svo sem um flutning milli skóla, undanþágu frá skólasókn eða annað sem viðkemur barni þeirra.
Í kjölfarið þjónustar Frigg svo alla þá sem halda utan um barnið, svo sem umsjónarkennara, skólastjóra og sveitarfélagið, sem einnig skrá viðbótarupplýsingar þar sem það á við - öll gögn um nemandann eru skráð í Frigg og sótt í Frigg.
Margþættur og margvíslegur
Fyrst og fremst er ávinningurinn með Frigg sá að í fyrsta sinn verða allar upplýsingar um barnið til á einum stað. Þetta gerir okkur sem samfélagi kleift að halda utan um barnið og koma í veg fyrir að það falli milli skips og bryggju eða hreinlega týnist í kerfinu.
Að auki fylgja Frigg ótal aðrir kostir. Með miðlægri og samræmdri skráningu gagna hljótum við ómetanlega heildræna yfirsýn yfir stöðu menntakerfisins alls. Þá mun innleiðing á nýjum stafrænum innviðum fyrir menntakerfið stórbæta skilvirkni, gæði og áreiðanleika þess.
Í ofanálag mun Frigg innihalda nýtt mælaborð sem birtir gögn í rauntíma um ástand kerfisins, stöðu mála innan hvers sveitarfélags og skóla og síðast en ekki síst hvers barns. Þetta gerir stofnunum, sveitarfélögum, skólastjórum og umsjónarkennurum kleift að taka ákvarðanir á þeirri stundu sem vísbendingar eru um að breytingar séu verða í starfseminni, eða hjá barni, og gera úrbætur af öryggi og í samræmi við þarfir hverju sinni.
Þar að auki verður Frigg verðmætt verkfæri í höndum sveitarfélaga, en með auknu gagnsæi og aðgengilegra yfirliti verður mun auðveldara fyrir sveitarfélög að gera upp og bæta greiðsluflæði sín á milli.
Nálgun og aðferðir
Við beitum hönnunarhugsun í okkar vinnu til að kryfja áskoranir og leita fjölbreyttra lausna. Það felur í sér annars vegar að hanna réttu lausnina sem við gerum með því að tala við notendur, skilja áskorunina og ná utan um hana með afmörkun þarfa. Hins vegar að hanna lausnina rétt en það felur í sér að velja og móta hugmyndir að lausnum og svo þróa þær, smíða og prófa með notendum.
Við nálgumst smíðina á Frigg á grunni samsettrar upplýsingatækni (composable IT). Við brjótum flókið heildarkerfi niður í smærri sjálfstæðar einingar (modules) sem hver og ein felur í sér ákveðna þjónustu. Einingarnar er auðvelt að taka í sundur og setja saman á ný, uppfæra, skipta út fyrir nýjar, eða bæta við með samþættingu án þess að innleiða þurfi nýtt heildarkerfi. Fjöldi eininga sem hægt er að raða saman er ótakmarkaður sem skapar okkur sveigjanleika og teygjanleika og gerir okkur kleift að skala verkefnið upp hratt og örugglega.
Við vinnum Frigg í sprettum sem er aðferðafræði til að besta vinnulag og hámarka framleiðni. Hver sprettur er vika að lengd og í honum undirbúum við eða framleiðum ákveðinn hluta af Frigg sem kallaðurð er MVP (Minimum viable product), en það er minnsta mögulega eining sem getur leyst áskorun notandans. Við byrjum smátt en vinnum í litlum og hröðum skrefum, og stundum stöðuga ítrum með því að sækja markvisst endurgjöf til notenda.
Við tryggjum að öll virkni og útgáfa uppfylli lágmarkskröfur eða skilyrði þau sem lýst er í lögum og reglugerðum sem um málaflokkinn gilda. Þannig verða ýmsar ráðstafanir innbyggðar og sjálfgefnar í Frigg sem hönnuð er og þróuð til að fylgja meginreglum og meðalhófi.
Nánari upplýsingar um stafræn viðmið og verklag má nálgast hér: https://island.is/s/stafraent-island/island-is-samfelagid/um-stafraent-island
Frigg felur í sér margvíslegar framfarir – ekki aðeins frá hagkvæmnis- og velsældarsjónarmiðum, heldur sömuleiðis tæknilegar umbætur sem orðið var brýnt að innleiða. Allar þessar nýjungar munu einfalda öllum hlutaðeigandi lífið; stjórnendum, kennurum, stofnunum, sveitarfélögum, forsjáraðilum – og auðvitað nemendum sömuleiðis. tæknilegar framfarir sem orðið var brýnt að innleiða.
